Türkiyənin müxalif Cümhuriyyət Xalq Partiyasının (CHP) keçmiş sədri Kamal Kılıçdaroğlu və komandası geri dönmək üçün hazırlıqlara başlayıb.
Teleqraf xəbər verir ki, bu barədə “DW Türkçe” məlumatlı mənbələrə istinadla bildirib.
Nəşrin yazdığına görə, Kamal Kılıçdaroğlu CHP-nin 38-ci qurultayında pozuntu iddiası ilə bağlı iyunun 30-da keçiriləcək məhkəmənin yekun qərarını gözləyir.
“Kılıçdaroğlu və komandası bunu əsas götürərək, partiya rəhbərliyinə dönməyə hazırlaşır”, - sabiq sədrə yaxın mənbə nəşrə deyib.
Kamal Kılıçdaroğluna yaxın mənbə onun qayıdacağı təqdirdə partiyada tutacaqları yeni vəzifələrlə bağlı deputatları məlumatlandırdığını bildirib. Mənbə məhkəmənin qərarından asılı olmayaraq, CHP-nin yola hazırkı sədr Özgür Özəllə davam edə bilməyəcəyini iddia edib.
Xatırladaq ki, CHP-nin 38-ci qurultayı 4-5 noyabr 2023-cü il tarixlərində keçirilib. Qurultayda Özgür Özəl qalib gələrək, Kamal Kılıçdaroğlunun 13 illik sədrliyinə son qoyub.
Qurultaydan sonra səsvermədə pozuntu iddiası ilə cinayət işi açılıb. Ankara Baş Prokurorluğu tərəfindən aparılan və artıq yekunlaşan istintaqda Kamal Kılıçdaroğlu zərərçəkən kimi tanınıb.
