Kənd təsərrüfatı istehsalında istifadə olunan kimyəvi maddələr - başqa adı ilə pestisitlər - tərəvəz və meyvələri bir çox zərərvericidən qorusa da, düzgün istifadə edilmədikdə, ana bətnindəki körpədən uşaqlara və böyüklərə qədər sağlamlığı təhdid edir.
Sherg.az xəbər verir ki, Türkiyədən Avropa ölkələrinə göndərilən bir çox məhsul əvvəlki illərdə pestisit, aflatoksin və salmonella kimi qalığa görə geri qaytarılmışdı.
Bu ilin əvvəlindən bəri də Avropa Birliyi bir çox məhsulla bağlı xəbərdarlıqlar edib. Yalnız Avropaya göndərilən məhsullarda deyil, daxili bazarda istehlak olunan məhsulların yoxlamalarında da dərman qalığı aşkarlanıb.
Greenpeace hesabatına görə, İstanbulda marketlərdən və bazarlardan götürülən 155 qida nümunəsinin 95-ində birdən çox pestisit qalığı müəyyən edilib.
Xüsusilə 6 yaşına qədər bu maddələrə məruz qalmaq uşaqlarda zəka geriliyindən tutmuş autizmə qədər bir çox problemə səbəb ola bilər.
Mütəxəssislərə görə, problemin həlli üçün nəzarət tədbirlərinin gücləndirilməsi vacibdir.
Türk Pediatriya Cəmiyyətinin İdarə Heyəti üzvü, professor Dr. Ertuğrul Kıykım, pestisitin uşaqlarda zəka geriliyinə səbəb olduğunu bildirib.
Kıykım həmçinin pestisitin davranış pozğunluğuna, diqqət çatışmazlığına və hiperaktivlik pozğunluğuna yol aça biləcəyini, həmçinin autizm əlamətlərinə rast gəlindiyini vurğulayıb.
Meyvə və tərəvəzlərin bol su ilə yuyulmasının vacibliyini deyən Kıykım davam edir:
"Bir az karbonat istifadə edə bilərsiniz. Əslində pestisit ağac böyüyərkən, meyvə əmələ gəlməmişdən əvvəl vurulur, amma kənardan gələn maddələr qabığında daha çox yığılır. Heç olmasa onları müəyyən qədər təmizləmək tövsiyə olunur. Lakin böyümə zamanı meyvənin içinə keçmiş pestisiti suda gözlətməklə təmizləmək, təəssüf ki, çox da mümkün deyil."
