COVID-19 artıq əvvəlki kimi təsirli olmasa da, hələ də mövcuddur.
Bunu APA-nın sualına cavab olaraq, Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı deyib.
O bildirib ki, COVID tam olaraq bitməyib və gələcəkdə də həyatımızda olmağa davam edəcək: “Buna görə də diqqətli olmaq və qoruyucu tədbirlərə riayət etmək lazımdır”.
Hande Harmancı qeyd edib ki, qrip virusları həyatımızın bir parçasıdır və hər il xüsusilə 65 yaşdan yuxarı insanlar üçün peyvəndlə bağlı tövsiyələr verilir.
İnfeksionist Aytən Ziyadova da "Sherg.az"a açıqlamasında bildirib ki, COVID-19 hələ də mövcuddur:
“Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancının bildirdiyi kimi, virus əvvəlki dövrlərə nisbətən daha az təhlükəli olsa da, tam itib getməyib və izlənməyə davam edir. Hazırda dünyada əsasən Omicron-un altvariantları yayılmaqdadır. Bunlara NB.1.8.1 (JN.1 qolu) və XFG (Stratus) variantları daxildir. Bu variantlar çox yoluxucudur, lakin ağır xəstəlik yaratma riski aşağıdır. XFG variantı daha sürətlə yayılır, amma simptomları əsasən yüngüldür. Həmçinin simptomlarda əvvəlki illərlə müqayisədə dəyişikliklər müşahidə olunur. Ənənəvi simptomlardan qızdırma, qoxu və dad itkisi əvvəlki qədər rast gəlinmir. İndiki hallarda boğaz ağrısı, burun axıntısı, öskürək, əzələ zəifliyi, yorğunluq və bəzən qarın nahiyəsində diskomfort daha geniş yayılıb. Xüsusilə XFG variantında bəzi qeyri-adi simptomlar qeydə alınır. Məsələn, əzələ yorğunluğu və hətta həzm problemləri. Mövcud vaksinlər, xüsusilə JN.1 və KP.2-yə uyğunlaşdırılmış monovalent vaksinlər, ağır xəstəliyə və ölümə qarşı güclü qoruma təmin edir. Laborator analizlər antikor səviyyəsində müəyyən azalma göstərsə də, real həyatda vaksinlər xəstəxanaya düşmə və ölüm riskini əhəmiyyətli dərəcədə azaldır. Buna görə də vaksinlər hələ də ən əsas qoruyucu vasitələrdən biridir”.
Ekspertin sözlərinə görə hazırda yenidən kütləvi peyvənd kampaniyalarına ehtiyac yoxdur:
“Lakin yüksək risk qruplarına – yaşlılara (65+), immun sistemi zəif olanlara, xroniki xəstəliyi olanlara və hamilə qadınlara – booster (yeniləmə) dozaları tövsiyə olunur. Bu booster dozaları qrip vaksini ilə birlikdə tətbiq edildikdə, ümumi xəstəlik yükü daha da azala bilər. Digər insanlar üçün isə hazırda yalnız ümumi profilaktik tədbirlər kifayət sayılır. Tövsiyə olunan əsas tədbirlər bunlardır: qapalı və izdihamlı məkanlarda maskalardan istifadə, əllərin mütəmadi gigiyenası, otaqların havalandırılması və simptomlar müşahidə edildikdə evdə qalmaq. Xüsusilə risk qrupunda olan şəxslər həkimlə məsləhətləşərək özlərinə uyğun peyvənd planı qurmalıdırlar. Yekun olaraq, COVID-19 hələ bitməyib, lakin həyatımıza əvvəlki qədər təsir etmir. Əsas məsələ fərdi profilaktika və risk qruplarının qorunmasıdır. Yenilənmiş vaksinlər və booster proqramları ilə yoluxma və ağırlaşma riski minimuma endirilə bilər”.
