Asim Vəliyev: Etiket məlumatı olmayan məhsulun təhlükəsizlik səviyyəsi “0”dır
Daxil olmuş müraciət əsasında Qida Təhlükəsizliyi Agentliyinin əməkdaşları Lənkəran rayonu, Digah kəndində fəaliyyət göstərən meyvə-tərəvəzin konservləşdirilməsi sexində plandankənar yoxlama keçirib.
Bu barədə AQTA məlumat yayıb.
Bildirilib ki, sex fiziki şəxs Valeh İsa Raqif oğluna məxsus olub.
Baxış zamanı müəssisədə sanitar-texniki və sanitar-gigiyenik vəziyyətin qənaətbəxş olmadığı, texnoloji ardıcıllıq prinsipinə əməl edilmədiyi, konservləşdirilmiş tərəvəz turşularının üzərində etiket məlumatlarının mövcud olmadığı müəyyən edilib.
Faktla bağlı qanunvericiliyin tələblərinə uyğun olaraq müəssiənin fəaliyyəti nöqsanlar aradan qaldırılanadək məhdudlaşdırılıb, sahibkar barəsində inzibati protokol tərtib olunub.
Məsələ ilə bağlı danışan təhlükəsiz qida tədqiqatçısı Asim Vəliyev "Sherg.az"a deyib ki, bütün qida məhsullarını seçərkən mütləq şəkildə etiket məlumatlarına diqqət etməliyik:
“Hər bir konserv məhsulunun üzərində məhsulun adı, tərkibi, istehsal və son istifadə tarixi, istehsalçı müəssisənin adı və ünvanı, saxlanma şəraiti və kütləsi qeyd olunmalıdır. Etiketsiz məhsul qeyri-qanuni sayılır. Şişmiş, deformasiyaya uğramış və paslanmış bankalardan olan qida məhsullarını almamaq məsləhətdr. Qapağın içəridən şişməsi botulizm kimi çox təhlükəli zəhərlənmə riskinin göstərir. Konservin içərisindəki maye bulanıq, qatı, məhsulun rəngi solğun və qeyri-təbii görsənirsə, bu texnoloji prosesin pozulma göstəricisdir. Konservlər sərin, quru və günəş işığından uzaq yerlərdə saxlanmalıdır. Meyvə-tərəvəz konservləşdirilməsi ciddi texnoloji ardıcıllıq tələb edən bir prosesdir. Əgər bu ardıcıllıq pozulursa çox ciddi təhlükə riskləri yaranar. Pis yuyulmuş tərəvəz, qeyri-steril alətlər və çirklənmiş su ilə istehsal olunan konservlərdə kif və maya göbələkləri əmələ gələ bilir. Bu da allergik reaksiyalar, bağırsaq pozuntuları və hətta aflatoksin kimi kanserogen maddələrin yaranmasına gətirib çıxarar. Sanitar-gigiyenik şəraitə əməl edilmədikdə isə bakteriyalar məhsula keçərək 2-3 saat içində zəhərlənməyə səbəb ola bilir. Bu hal ishal, qusma, qızdırma kimi simptomlarla özünü göstərir. Etiket məlumatı olmayan məhsulun kim tərəfindən, nə vaxt, hansı şəraitdə və hansı maddələrlə hazırlandığını bilmədiyimiz üçün təhlükəsizlik səviyyəsi “0”dır. Bu tip məhsullarda kimyəvi qatqılar, qadağan olunmuş konservantlar və allergik maddələr ola bilər”.
