Yeni dərc olunan bir araşdırma bəzi yuxu dərmanlarının uzunmüddətli istifadəsinin yaddaş üzərində zərərli təsirlər yarada biləcəyini üzə çıxarıb.
Sherg.az xəbər verir ki, "Sleep" adlı elmi jurnalda dərc olunan araşdırmada xüsusilə yaşlı böyüklərdə tez-tez təyin edilən benzodiazepinlər və benzodiazepin reseptor aqonistlərinin xroniki istifadəsinin təsirləri araşdırılıb. Bu dərmanlar beyin aktivliyini yavaşladaraq yuxuya keçidi asanlaşdırsa da, yüksək dozalarda istifadəsi orqanizmin təbii yuxu balansını dəyişdirir.
"Daily Mail"də yer alan araşdırmada yuxu dərmanlarının xüsusilə yaşlı şəxslərdə yaddaş itkisi və idrak pozuntusu kimi mənfi təsirlərlə əlaqəli olduğu da müəyyən edilib.
Araşdırma yuxu dərmanı qəbul edən şəxslərin ertəsi gün niyə özlərini yorğun, halsız və ya unutqan hiss etdiklərinə dair ipucları təqdim edir.
Britaniyalı alimlərin fikrincə, yuxusuzluğu çox vaxt həyat tərzi dəyişiklikləri ilə müalicə etmək mümkündür. Hər gün eyni saatda yatmaq, yuxu mühitini qaranlıq və sakit etmək, gündüzlər idmanla məşğul olmaq bu dəyişikliklər arasındadır. Bunlar effekt vermədikdə isə bilişsel-davranışçı terapiya tövsiyə olunur.
