"Son iki ildə Azərbaycanda enerji, bərpa olunan enerji və enerji səmərəliliyi sahələrində dörd mühüm qanun qəbul olunub. Hazırda üç yeni qanun layihəsi üzərində- istilik, qaz təchizatı və tənzimləyici orqanla bağlı qanun layihələri üzərində iş aparılır".
“APA-Economics” xəbər verir ki, bunu Londonda Avropa Yenidənqurma və İnkişaf Bankının (EBRD) illik iclası çərçivəsində “Azərbaycan: “yaşıl artım” və əlaqəliliyin formalaşan qapısı” adlı panel müzakirəsində energetika nazirinin müavini Elnur Soltanov deyib.
O, xüsusilə istilik təchizatı haqqında qanunun əhəmiyyətini vurğulayıb: “Bu sahədə əsas diqqət mərkəzləşdirilmiş istilik sistemlərinin inkişafına və yüksək səmərəlilik təmin edən istilik nasosları kimi müasir texnologiyaların tətbiqinə yönəlib”.
E. Sultanov hazırlanmaqda olan “Tənzimləyici haqqında” qanunun ölkədə real bazar tariflərinin formalaşmasında mühüm rol oynayacağını bildirib. Bu, enerji sektorunda şəffaf və dayanıqlı idarəetmənin təşviqinə xidmət edəcək.
Nazir müavini qeyd edib ki, 2028-ci ilədək Azərbaycanda bərpa olunan enerji mənbələrinin payı 30%-i ötəcək. Bu sahədə Avropa Yenidənqurma və İnkişaf Bankının (EBRD) dəstəyi xüsusi rol oynayır.
Qeyd edilib ki, Azərbaycanda fərdi və aktiv istehlakçılar artıq 150 kilovatadək günəş panelləri quraşdıra və enerji alqı-satqısı həyata keçirə bilirlər. Bu modelin genişləndirilməsi istiqamətində işlər davam etdirilir.
Elnur Soltanov vurğulayıb ki, enerji səmərəliliyi sahəsi Azərbaycanda yeni və strateji əhəmiyyətli istiqamət kimi ön plana çıxır. Bu sahədə binaların və məişət avadanlıqlarının sertifikatlaşdırılması ilə bağlı 12-yə yaxın normativ sənəd hazırlanır.
“Enerji səmərəliliyi fondu artıq yaradılıb və bu fondun maliyyə dayanıqlılığı fosil yanacaqlardan əldə edilən vergilər hesabına təmin olunur. Sovet dövründən miras qalmış binaların enerji baxımından qeyri-səmərəli olması bu sahədə böyük potensial yaradıb. Bu sahə demək olar ki, toxunulmamış sahədir və böyük imkanlar vəd edir”, – deyə o, əlavə edib.
Sonda qeyd olunub ki, yaxın aylarda Energetika Nazirliyi enerji səmərəliliyi ilə bağlı daha çox təşəbbüslərlə çıxış edəcək.
