Bakıda Azərbaycan, Pakistan və Türkiyənin xüsusi təyinatlı qüvvələri nümayəndələrinin iştirakı ilə “Üç Qardaş-2021” birgə təliminin yekun planlaşdırılması konfransı keçirilir. Bu barədə Müdafiə Nazirliyi məlumat yayıb. Bildirilib ki, tədbirdə təlimin proqramı, məqsədi, qarşıya qoyulan tapşırıqlar, iştirakçıların sayı və digər təşkilati məsələlər dəqiqləşdirilir. “Üç Qardaş-2021” beynəlxalq təliminin dost və tərəfdaş ölkələrin hərbi qulluqçularının sülh və müharibə dövründə əməliyyatlara hazırlanması, bilik və təcrübə mübadiləsinin aparılması üçün əlverişli mühitin yaradılmasına müsbət təsir göstərəcəyi qeyd olunub.
Hərbi ekspert Ədalət Verdiyev təlimlərin əhəmiyyətini “Sherg.az”a şərh etdi:
“Digərləri kimi, bu beynəlxalq təlimdə də əsas məqsəd orduların döyüş hazırlığını artırmaqdır. Üçtərəfli təlimlərin keçirilməsi bu ilin yanvar ayından məlum idi. Türkiyə və Pakistan bizim ən yaxın tərəfdaşlarımızdır. Ona görə də “Üç Qardaş-2021” hazırlıqları təəccüblü deyil. Bakı, Ankara və İslamabadın konkret sahələrdə nailiyyətləri var. Məsələn, Türkiyə terrorla mübarizədə, Pakistan dağlıq ərazidə xüsusi əməliyyatların keçirilməsində təcrübəlidir. Azərbaycan isə bunların hər ikisinin vəhdətində müharibə praktikası qazanıb. “Üç Qardaş-2021” təlimlərində isə döyüş təcrübəsi, mübarizə üsulları bölüşüləcək. Fikrimcə, təlimlər payızın ilk aylarında başlayacaq”.
