"Radikal çağırışlar edən, müxtəlif dezinformasiyalar yayan saytlarla bağlı ciddi tədbirlərin görülməsi Mətbuat Şurasının (MŞ) tam səlahiyyətində deyil".
Bunu "Sherg.az”a Gəncə və Mingəçevir hadisələri zamanı təxribat xarakterli çağırışlar edən saytlar və sosial mediadakı səhifələrə qarşı mübarizədən danışarkən "525-ci qəzet”in baş redaktoru, yazıçı-jurnalist Rəşad Məcid söyləyib.
O bildirib ki, elektron saytların qeydiyyatı, fəaliyyəti problemləri ilə həm Nəqliyyat, Rabitə və Yüksək Texnologiyalar Nazirliyi, həm də hüquq-mühafizə orqanları məşğul olmalıdır:
"Xaricdən maliyyələşən bir sıra saytlar var. Bəziləri müxtəlif dairələrə xidmət edirlər. Həmin saytları media deyil, təxribatçı qruplar adlandırmaq lazımdır. Mətbuat Şurasının komissiyası bu məsələyə məlumat bildirə bilər. Lakin konkret araşdırma aparılması, tədbirlər görülməsi hüquq-mühafizə orqanlarının səlahiyyətindədir. Mütəmadi olaraq, Azərbaycanın əleyhinə çağırışlar səsləndirən saytlar, sosial şəbəkə səhifələri, profillər aşkarlanmalı, qanunauyğun şəkildə məsuliyyətə cəlb edilməlidir”.
Qeyd edək ki, iyulun 3-də Mingəçevir İES-də baş verən qəza və iyulun 10-u Gəncədə törədilən iğtişaşlar zamanı "nuraz.com", "abna.com", "aran.news", "qafqaz.ir", "rasthaber.com", "ru-clip.ru" kimi saytlar həqiqətə uyğun olmayan, milli maraq və təhlükəsizliyə zidd, cəmiyyətdə xaotik əhval-ruhiyyə yaradan təxribat xarakterli dezinformasiyalar tirajlayıblar.
Aysel Aslan
