Xaricə yaşayan, amma ürəyi Vətənlə döyünən bir azərbaycanlı kimi , iyulun 10-da Gəncədə baş verən təxribatda, iki layiqli polis əməkdaşının şəhid olmasını ürək ağrısı ilə eşitdim. Azərbaycan polisi hər zaman öz xidməti vəzifəsini layiqincə yerinə yetirib, asayişin qorunmasında mühüm xidmətlər göstərib. Gəncə hadisələri zamanı da Azərbaycan polisi sübut etdi ki, öz canı bahasına ölkəmizdə sabitliyi, asayişi qorumağa qadirdir.
Gəncədə baş verən iğtişaşlar mahiyyətinə görə terror hadisələridir. Lakin bunu hamı bilməlidir ki, oğullarımızın canı və qanı bahasına əldə edilən, ümummilli lider Heydər Əliyevin müdrik, qətiyyətli addımları ilə dönməz xarakter alan Azərbaycanın müstəqilliyini heç bir qüvvə əsla sarsıda bilməz.
Hər birimiz,Vətəni sevən bir azərbaycanlı kimi, dövlətimizin başçısına daha çox dəstək olmalıyıq, dövlət-xalq birliyinin sarsılmazlığına töhfə verməliyik. Birliyə, dövlətçiliyə, milli təhlükəsizliyimizə, xüsusilə də ölkədə aparılan daxili və xarici siyasətə dəstək olmağımız son dərəcə vacibdir. Prezident İlham Əliyev və Birinci vitse-prezident Mehriban Əliyeva xalqımızın rifahı, gələcəyi naminə var qüvvələri ilə çalışırlar. Azərbaycan Prezidentinin həyata keçirdiyi daxili və xarici siyasəti hər zaman dəstəkləməli, dövlətimizin və dövlətçiliyimizin yanında olmalıyıq. 1991-ci ildən bu günədək müstəqillik tariximizə nəzər salanda görürük ki, dövlət müstəqilliyimiz asan yolla qorunub saxlanılmayıb. Buna görə də, bəzi mənfur xarici və daxili qüvvələrə imkan verməməliyik ki, öz məkrli planlarını həyata keçirsinlər, qarşıdurma yaratsınlar.
Ən başlıcası isə Azərbaycan xalqı Prezident İlham Əliyevin apardığı siyasəti ürəkdən dəstəkləyir və müdafiə edir. Bu gün ölkəmizdə möhkəm birlik və sabitlik hökm sürür. Dövlətimiz ölkəmizdə hər cür sabitliyi və normal həyat tərzini təmin edib. Bu, bizim böyük sərvətimizdir. Bu sərvəti qorumaq hər birimizin şərəfli və məsuliyyətli borcudur.
Gülağa Tənha
