"Qərb rəsmiləri, diplomatlar Qarabağ münaqişəsinin həllində status-kvonun saxlanması ilə baş qatmağa çalışır. Onlar lazımdır ki, bu hadisələr bizim yadımızdan çıxsın”.
Bunu "Sherg.az”a ABŞ-ın Azərbaycandakı səfiri Robert Sekutanın Azərbaycan və Ermənistan prezidentlərinin görüşləri haqqında açıqlamalarına münasibət bildirərkən millət vəkili Aqil Abbas deyib. Deputat bildirib ki, münaqişənin həlli üçün əlavə qüvvələr aradan çəkilməlidir:
"Həmin qərbli rəsmilər hərəsi öz işi ilə məşğul olsun. Bu məsələni tənzimləməyə Azərbaycanın gücü çatır və həll edəcək. Dövlətimiz öz torpaqlarını azad etməyə hazırdır.
Bəzən əcnəbi diplomatlar, həmsədrlər 5 rayonun qaytarılması haqqında fikirlər səsləndirir. Mətbuat da həmin açıqlamaları müzakirə edir, manşet çıxarır. Heç kim sual etmir ki, bəs o biri rayonlar nə olacaq? Belə açıqlamalar verib, bizi həmin 5 rayon məsələsinə kökləmək, danışıqları qabartmaq yersizdir.
Ali Baş Komandanımızın əmri ilə aprel döyüşlərində də sübut etdik ki, problemimizi həll edə bilərik. Kənar qüvvələr çəkilsin, biz özümüz münaqişəni həll edərik”.
Qeyd edək ki, Robert Sekutanın sözlərinə görə, hazırda ATƏT-in Minsk qrupu həmsədrləri hər iki ölkənin xarici işlər nazirlərinin görüşünü təşkil etmək üçün iş aparırlar.
Aysel Aslan
