"Marşrut avtobuslarının interval artımından söhbət gedə bilməz”.
Bunu "Sherg.az”a son günlər vətəndaşların bəzi marşrut avtobuslarında interval artımı ilə bağlı şikayətlərini cavablandırarkən Bakı Nəqliyyat Agentliyinin (BNA) Mətbuat Xidmətinin rəhbəri Mais Ağayev deyib.
Qurum sözcüsü qeyd edib ki, bəzi marşrutlarda günün pik saatlarında gecikmələr olur:
"Lakin bunun səbəbləri fərqlidir. Bəzən yollarda tıxac yaranır, razılaşdırılmadan hansısa qazıntı işləri aparılır. Bütün bunlar isə avtobusların hərəkət qrafikində gecikmələrə səbəb olur.
İntervallarda ləngimələr süni səkildə sürücü və ya daşıyıcı şirkətin digər əməkdaşları tərəfindən baş verirsə, bu zaman BNA səlahiyyətləri çərçivəsində sərnişinlərimizi narahat edən bu kimi xoşagəlməz halın aradan qaldırılması istiqamətində işlər görür”.
M.Ağayev şikayətləri "qaynar xətt”ə ünvanlamaqla bağlı sərnişinlərə müraciət edib:
"Sərnişinlərimizdən xahiş edirik ki, bu sahədə bütün şikayətləri bizə ünvanlasınlar. Çünki vətəndaşların müraciəti bizim üçün çox önəmlidir. Vətəndaşlar yalnız "qaynar xətt”imiz deyil, eyni zamanda "Facebook” pofilimizə və alo141.az saytına da müraciətlərini edə bilərlər.
Qeyd etməliyəm ki, məhz vətəndaşlardan gələn müraciətlər əsasında bir çox çatışmazlıqlar aşkar edilərək aradan qaldırılıb.
Bu fəallığa görə də hər kəsə təşəkkür edirik”.
Aysel Aslan
