"Azərbaycan ya sülh yolu ilə, ya da digər vasitələrə əl atmaqla öz dədə-baba torpaqlarını işğaldan azad edəcək".
Bu barədə "Sherg.az"a ABŞ Prezidentinin milli təhlükəsizlik məsələləri üzrə müşaviri Con Boltonun "ABŞ Dağlıq Qarabağ münaqişəsinin dinc yolla həllinin tapılmasına sadiq qalacaq" bəyanatını şərh edərkən, "Qərbi Kaspi Universitetinin professoru, politoloq Fikrət Sadıqov bildirib.
Onun sözlərinə görə, C.Bolton ABŞ-ın ənənəvi ifadəsini təkrarlayaraq bildirdi ki, Dağlıq Qarabağ münaqişəsi sülh yolu ilə həll olunmalıdır:
"ABŞ rəsmisi söylədi ki, o hər iki ölkə arasında olan bu münaqişənin həlli istiqamətində tərəfləri dinləmək üçün təşrif buyurub. Amma C.Boltonun fikirləri inandırıcı deyil. Çünki Dağlıq Qarabağın Azərbaycan ərazisi olması və Ermənistanın onu işğqal etməsi haqqında BMT-nin 4 qətnaməsi var. C.Bolton və ABŞ administrasiyası Ermənistan və Azərbaycan arasında sülhün yaranmasını istəyirsə, dərhal torpaqlarımızın azad olunması istiqamətində əməli işə başlamalıdır. Düşünürəm ki, ABŞ prezidentinin milli təhlükəsizlik məsələləri üzrə müşavirinin bu cür açıqlamaları onun da həmsədr dövlətlərlə eyni mövqe tutduğunu göstərir.
Xarici dövlət rəsmilərinin bu kimi açıqlamaları bizi qane edə bilməz. Bəlkə, C.Bolton İrəvan səfərində qarşı tərəfi dinlədikdən sonra onda bu məsələ haqqında konkret fikir formalaşar.
C.Bolton yaxşı bilir ki, beynəlxalq hüquq Azərbaycanın tərəfindədir. Dağlıq Qarabağın münaqişəsinin Azərbaycanın ərazi bütövlüyü çərçivəsində həllinə dair qətnamələr və ərazi bötövlüyümüzü dəstəkləyən çoxsaylı dövlətlər var. Düşünürəm ki, bu kimi faktorlar istər C.Bolton, istərsə də digərləri üçün yetərli sübutdur. Və Azərbaycan heç bir dövlətin torpağını işğal etməyib, sadəcə ölkəmiz tapdaq altında olan ərazimizin azad olunmasını tələb edir”.
Kənan Eynuroğlu
