"Meyitdən orqan köçürülməsinin Azərbaycanda reallaşdırılması uzun müddət çətin olacaq”.
Bunu "Sherg.az”a gələcəkdə meyitdən orqan köçürülməsi ilə bağlı müvafiq klinikaların yaradılmasının mümkünlüyündən danışarkən tibb elmləri doktoru, professor Adil Qeybulla deyib.
O bildirib ki, bunun səbəbi insanların meyitdən orqan köçürülməsinə icazə verməməsidir:
"Bu məsələlər psixoloji həllini tapana qədər zaman lazımdır. Sözsüz ki, bütün orqanlar meyitdən götürülə bilməz. Bu məsələni tənzimləmək üçün icbari tibbi sığorta yetərli deyil. Orqan bankı yaratmaq olar. Bunun üçün qanun, sistem müəyyən olunmalı, şəbəkə yaradılmalıdır.
İcbari tibbi sığorta isə daha çox əhalinin sosial müdafiəsinə hesablanmış xidmət növüdür. Ən azından insanların müəyyən tibbi xidmətlərdən, təxirəsalınmaz yardımdan, doğuşdan və s. azad olunması üsuludur. Bu, vacib addımdır. İcbari tibbi sığortanın optimal həyata keçirilməsi üçün ayrılan vəsaitin rasional yönəldilməsi çox vacibdir. İcbari tibbi sığortadan vətəndaşın xeyir götürməsi bu işin düzgün qurulmasından birbaşa asılıdır. Ola bilər ki, nisbətən az vəsaitlə bu iş daha uğurlu qurulsun. Yaxud, əksinə çox vəsaitlə o qədər uğurlu olmaya da bilər. Ona görə, bu sahədə lazımi mütəxəssislərlə məsləhətləşmək, müxtəlif praktikalardan istifadə etmək lazımdır. Bu, həll edildikdən sonra donor haqqında qanun, meyitdən orqan köçürülməsi və s. məsələlər yerinə oturacaq”.
Qeyd edək ki, Milli Məclisin Səhiyyə komitəsinin sədr müavini Musa Quliyev Azərbaycanda meyitdən orqan köçürülməsinin mümkünlüyündən danışıb. Deputat bildirib ki, ölkədə icbari tibbi sığortanın geniş tətbiqindən sonra bu daha sürətlə baş verə bilər.
Aysel Aslan
