Türkiyənin Azərbaycanla əlaqələri yüksək strateji səviyyədədir. Hər iki ölkədə prezident seçilən dövlət başçısının birinci olaraq qardaş respublikaya getməsi ənənəvi hal alıb. Bu da iki ölkənin qardaş münasibətlərinin əyani sübutudur. Türkiyə-Azərbaycan ikitərəfli əlaqələri bölgədə sabitlik və sülhün qurulmasına xidmət edir, heç bir ölkəyə təhdid yaratmır. Münasibətlər strateji ortaqlıq anlayışını tam mənası ilə daşıyır.
Son 25 ildə iki ölkə arasında əldə edilmiş uğurlar sarsılmaz birlik, dostluq və qardaşlıq bağının bir göstəricisidir. Türkiyə Dağlıq Qarabağ münaqişəsinin Azərbaycanın ərazi bütövlüyü və suverenliyi içərisində, sülh yolu ilə həllinə səy göstərir. Bu çərçivədə ATƏT-in Minsk Qrupunun bir üzvü olaraq cəhdlərini əsirgəmir. Bundan başqa, enerji mövzusu da iki ölkə arasında əhəmiyyət daşıyan məsələlərdən biridir. Qlobal layihələrin icrası Azərbaycan və Türkiyənin mövqeyi və bölgədəki strateji əhəmiyyətini daha da artırıb. Ötən gün liderlərin görüşündə bir daha bəyan edilib ki, Türkiyə-Azərbaycan dostluğu, qardaşlığı sarsılmaz və əbədidir. Vurğulanıb ki, birgə layihələr nəinki region, ümumilikdə Avrasiya üçün böyük əhəmiyyət daşıyır və regional sabitliyə böyük töhfə verir.
Milli Məclisin sədri Oqtay Əsədov "Anadolu” agentliyinə açıqlamasında bildirib ki, etibarlı strateji tərəfdaş olan Türkiyə ilə əlaqələri gücləndirmək və genişləndirmək Azərbaycanın xarici siyasətinin mühüm elementidir: "Birgə həyata keçirdiyimiz Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars dəmir yolu və TANAP, Cənub Qaz Dəhlizi kimi ortaq layihələrimiz regionun əhəmiyyətini artırır, sülh və inkişafa xidmət edir. BTQ dəmir yolu Avropa və Asiyanı birləşdirməyin ən rahat və qısa yoludur. İnanıram ki, bu dəmir yolu xəttinin istifadəsi xalqlarımızın və ölkələrimizin rifahının daha da yüksəlməsinə, tranzit imkanlarının artmasına, beynəlxalq əməkdaşlığın genişlənməsinə töhfə verəcək”. Spiker iki ölkə arasında ticarət həcminin 5 milyard dolları aşdığını vurğulayıb.
Qardaş ölkələr arasındakı güclü əlaqələri şərh edən Beynəlxalq "Vizyon” Universitetinin prorektoru, politoloq Hasan Oktay bildirib ki, Türkiyədə 24 iyunda keçirilmiş seçkidən sonra yeni dövlət idarəetmə sistemi dövriyyəyə girib. Prezidentliyin yeni idarəetmə sistemi olduğu və baş nazir vəzifəsinin ləğv edildiyi yeni sistemdə Türkiyə daxili və xarici siyasət sahəsində olduqca aktiv fəaliyyət göstərəcək: "Bu mənada, Türkiyənin xarici siyasətdə daha çox önəm verdiyi iki ölkə var: - qardaş Azərbaycan və KKTC.
Ərdoğanın andiçmə törənini bitirər-bitirməz Bakıya səfər eləməsi Azərbaycan üçün çox vacibdir. Çünki Türkiyənin dəstəyini almış Azərbaycan və Kipr beynəlxalq sistemdə və regional siyasi münasibətlərdə mövqelərini xeyli gücləndirəcəklər. Türkiyənin Azərbaycana daha çox diqqət ayırması və bu dəstəyini mütəmadi şəkildə artıraraq, davam etdirməsi yaxın gələcəkdə Türkiyənin yürüdəcəyi xarici siyasətin ip uclarını aşkara çıxarır. Yəni bu o deməkdir ki, Azərbaycan və Kıbrıs hər zaman Türkiyə üçün çox vacib maraq dairəsidir”.
İsmayıl
