Azərbaycan Prezidenti İlham Əliyev və Ermənistanın Baş naziri Nikol Paşinyan Vyanada görüşəcəklər.
Azərbaycan Xarici İşlər Nazirliyinin mətbuat xidmətindən bildirilir ki, ATƏT-in Minsk Qrupunun həmsədrlərinin təklifi əsasında görüşdə Ermənistan-Azərbaycan Dağlıq Qarabağ münaqişəsinin həlli üzrə müzakirələr aparılacaq.
Artıq 29 mart tarixində Avstriyanın paytaxtı Vyana şəhərində görüşünün keçirilməsi barədə razılıq əldə olunub.
Görüşdən gözləntilərini dilə gətirən politoloq Tofiq Abbasov "Sherg.az”a bildirib ki, Ermənistan rəsmiləri hər zaman Dağlıq Qarabağ münaqişəsinin həlli fonunda gedən danışıqlarda aqressiv, anlaşılmaz və özləri üçün təhlükəli davranış sərgiləyirlər:
"Yəni işğalçı ölkə münaqişənin həlli istiqamətində hər hansısa bir müsbət addım atmır. Elə onun nəticəsində də dünən Azərbaycan əsgəri şəhid oldu. Bunun səbəbi Ermənistanın Azərbaycanla olan siyasi prosesi dağıtmaqla məşğul olmasıdır. Hər zaman işğalçı ölkə başqa sahələrdə tətbiq etməli olduğu müntəzəmliyi məhz bu prosesdə göstərir. Fikrimcə, bütün bunlar Ermənistanın sülh prosesinə hazır olmamasından xəbər verir.
Hər dəfə Azərbaycan tərəfi iki ölkə arasında baş verən münaqişənin həlli istiqamətində addım atdıqda Ermənistan cəbhə xəttində təxribat törədib, atəşkəsi durmadan pozur. Elə indi də görüşlər ərəfəsi işğalçı ölkə sabitliyi pozmağa cəhdlər göstərir.
Məhz son günlər baş verənlər də bunu sübut edir. Ermənistan bütün dünyaya bəyan edir ki, Azərbaycanla olan təmas xəttində sakitlik yoxdur. Bu səbəbdən də münaqişənin dinc yolla həlli üçün zəmin görünmür.
Amma hər zaman Azərbaycan bildirib ki, bizim Ermənistanla təmas xətti ərazilərmizdə yaşayan dinc insanlar daim risklərlə üz-üzədir. Lakin Ermənistanın ölkəmizlə olan təmas xəttinə yaxın əraziləri Azərbaycanın işğal olunmuş torpaqlarıdır və orada insanlar yaşamır”.
T.Abbasov onu da bəyan edib ki, hazırda növbəti görüş ərəfəsində Ermənistanın təxribatlarının şahidi oluruq:
"Bu da ondan xəbər verir ki, Ermənistanda nisbətən yeni qüvvə hakimiyyətə gəlsə də, onun tətbiq etdiyi siyasi kurs köhnə kursdur.
Həmin kursun qarşısında duran məsələlər də Azərbaycan torpaqlarının işğalda qalmasını davam etdirmək, sülh prosesini sonuna qədər parçalamaqdır. Hesab edirəm ki, bir ilə yaxın hakimiyyətdə olan Nikol Paşinyan köhnə, özünü doğrultmayan siyasəti təkrar etməklə özünü riskə atır”.
Kənan Eynuroğlu
