"Dağlıq Qarabağ münaqişəsinin həll edilməsi bəzi ölkələrin marağında deyil”.
Bu barədə "Sherg.az”a millət vəkili Azərbaycan Boks Federasiyasının vitse-prezidenti, texnika elmləri namizədi, professor Ağacan Abıyev bildirib. Parlamentari qeyd edib ki, əslində bu münaqişə həll edilməli idi:
"Amma yaradılan komissiyaların, təşkilatların üzvləri nə düşünür, nəyi uzadır? Torpaqlarımızın işğal altında olmasına görə, millət, qaçqın və məcburi köçkünlər əziyyət çəkir. Bunu görmürlər? Beynəlxalq təşkilatlar məlum məsələləri tənzimləyib, insanları razı salmalıdır. Bunu bacarmırlarsa, həmin təşkilatlara nə ehtiyac var? Başa düşmürəm, yaradılan beynəlxalq komissiyalar nə üçündür? ATƏT-in Minsk qrupu münaqişəni həll edə bilməyəcəksə, niyə yaradılıb? Əslində Dağlıq Qarabağ münaqişəsini yoluna qoymaq bu qədər də çətin deyil.
Ermənilər torpaqlarımızı işğal ediblər. İşğalçı dövləti tanımaq lazımdır. Münaqişənin həll edilməsinin bu qədər uzanması vasitəçilərin hansısa marağının olmasından xəbər verir. Ermənistan nə ölkədir ki, münaqişənin həllinə bu qədər təsir göstərsin ?”
Hesab edirəm ki, Dağlıq Qarabağ münaqişəsinin həllini aidiyyəti təşkilatlar təmin edə bilər. Lakin istənilən beynəlxalq təşkilat bu məsələdə obyektiv olmalıdır. Bütün hallarda biz öz sözümüzü demişik. Azərbaycan bir qarış torpağını belə heç kimə verməyəcək. Danışıqların nəticəsi olmazsa, aprel döyüşlərini təkrarlaya bilərik. Amma biz müharibə deyil, beynəlxalq qanunlar əsasında, sülh yolu ilə problemin həll olunmasını istəyirik.
Hər kəs öz ölkəsini tanımalı və öz torpaqlarında yaşamalıdır. Heç kimin başqa ölkənin ərazisini işğal edib, ələ keçirməyə ixtiyarı yoxdur. Bu beynəlxalq normalara hər kəs riayət etməlidir. Bu normalara riayət etməyən Ermənistan kimi kiçik dövlətlərdən isə tələb edilməlidir. Gec-tez münaqişə həll ediləcək və obyektiv şəkildə torpaqlarımız qaytarılacaq”.
Qeyd edək ki, prezident İlham Əliyev Tehranda Azərbaycan, İran və Rusiya dövlət başçılarının üçtərəfli Zirvə görüşündə çıxış edərkən BMT Təhlükəsizlik Şurasının qətnamələrinin yerinə yetirilməməsinə toxunub. Ölkə başçısı bildirib ki, bu gün dünyada beynəlxalq hüququn normalarının bərqərar olması gündəlikdə duran ən önəmli məsələlərdən biridir. Əfsuslar olsun ki, bir çox hallarda bu normalar işləmir və kobudcasına pozulur. Ermənistan-Azərbaycan, Dağlıq Qarabağ münaqişəsi buna əyani misaldır.
Ayyət Əhməd
