"Uşaqların dini mərasimlərə aparılmasının qadağan edilməsi ölkədə dini qrupların qarşısını almaq üçün atılan addımdır”.
Bunu "Sherg.az”a uşaqların dini mərasimlərdə iştirakı ilə bağlı qadağalara münasibət bildirərkən ilahiyyatçı Hacı Atif İsmayılov deyib.
O bildirib ki, maariflənmək üçün hər hansı məhdudiyyət yoxdur:
"Əslində hər bir insan azaddır və bu məsələləri azad şəkildə icra edə bilər. Sadəcə bu qadağalar qurumların, rəsmi orqanların atdığı addımlar insanların kor-koranə, təbii şəkildə bu proseslərə meyl etməsinin qarşısını almaq üçündür. Hazırda bölgələrdə bəzi qeyri-ənənəvi dinlər formalaşıb. Bu isə insanların həqiqi maariflənməsinə mane olur. Onların dindən uzaqlaşdırılması istiqamətində yeni metodlar tətbiq edilir. Bunlardan biri də azyaşlıların bağçalardan, orta məktəblərdən başlayaraq müxtəlif tədbirlərə cəlb edilməsidir.
Bundan əlavə hər hansı dini ayinləri yerinə yetirmək adı altında insanlar bəzi yerlərdə toplanır. Azərbaycanda ənənəvi dinlərin təbliği sahəsində yaşa məhdudiyyətinin tətbiq edilməsinin məqsədə uyğun olduğunu demək çətindir. Amma bu qadağalar qeyri-ənənəvi dinlərin formalaşmasının qarşısını almaq üçün nəzərdə tutla bilər”.
Qeyd edək ki, uşaqlara qorxu gətirən materialların, qan görmək, onları stress, qorxu içinə salan məlumatların və görüntülərin təqdim olunması qadağan edilir. Bu, "Uşaqların sağlamlığına və inkişafına ziyan vuran informasiyalardan qorunması haqqında” yeni qanun layihəsində öz əksini tapıb.
Həmçinin, qanun layihəsində uşaqların dini mərasimlərdə iştirakı ilə bağlı qadağalar öz əksini tapıb. Qanun layihəsi Aərbaycan Respublikası Prezidentinin Administrasiyasına təqdim edilib.
Aysel Aslan
