"Dünyada gedən proseslər, siyasi gərginliklər, davam edən müharibələr sadə insanların psixologiyasına da mənfi təsir edir”.
Bunu "Sherg.az”a son vaxtlar cəmiyyətdə, insanlarda müşahidə olunan aqressiyanın səbəblərini izah edərkən psixoloq Azad İsazadə deyib.
O bildirib ki, insanlar bir-birini dinləmək istəmir, bacarmır:
"Hamı öz bildiyini başqasına yeritmək istəyir. Bir-birimizin sözünü yarıda kəsirik, axıra qədər dinləmək istəmirik. Bu, istər-istəməz aqressiya yaradır.
Biz dərdimizi bölüşəndə, fikirlərimizi kiməsə çatdıranda nisbətən rahatlaşırıq. O enerji bədəndən çıxmadıqda isə aqressivləşmə baş verir. Sözlə başa sala bilmədikdə, hətta fiziki təsirə qədər gəlib çıxır. Bəzən düz sözü elə aqressiv formada deyirik ki, qarşı tərəf bunu eşitmək istəmir.
Deyirlər ki, küçədə, bayırda insanların sifətindən zəhrimar yağır. "Bəxt üzüyü” filmində belə bir ifadə var: "Zəhrimarı çox elə”. Bizdə üzdə zəhrimar olması ciddiliyin rəmzinə çevrilib. Bu gün küçədə tək gedən insan gülürsə, ya əcnəbi, ya da ruhi xəstədir. Hamımız özümüzü həddindən artıq ciddi göstərməyə çalışırıq.
Bu nədənsə, zəhrimarın çox olması ilə ölçülür. İnsan nə qədər sifətdə zəhrimar çox olsa, daha ciddi görünəcək. İnsanlarda belə fikir formalaşıb ki, üzüm gülsə, düzgün başa düşməyəcəklər, problemlərlə daha çox yükləyəcəklər”.
Aysel Aslan
