"Neftin qiymətinin bir neçə gün enməsi, yaxud yüksəlməsi tendensiya yaratmır”.
Bunu "Sherg.az”a neftin qiymətinin son bir neçə gündə davamlı artıb-azalmasının səbəblərini izah edərkən iqtisadçı-ekspert Fuad İbrahimov söyləyib.
O bildirib ki, neftin qiyməti ilə bağlı məsələlərin arxasında müxtəlif motivlər dayana bilər:
"Ola bilər ki, proses hansısa siyasi motivə görə baş versin. Məsələn, Rusiya və Amerika arasında münasibətlər pozulur. Rusiyanın neft amilindən asılılığı var, ABŞ-ın təzyiqi nəticəsində neftin qiyməti aşağı düşür. Yaxud digər səbəblər də ola bilər.
Dünya iqtisadçıları açıq- aydın bəyan edirlər ki, hazırda hansısa məhsulun qiymət əmələ gəlmə prosesi birmənalı elektron ticarət platformalarının həcm indikatorlarından asılıdır. Yəni tam əminliklə neftin qiymətinin artıb, azalacağını proqnozlaşdırmaq olmur. Ancaq həcm indikatorlarının məlumat bazasını əldə edən iri şirkətlər proqnoz verə bilərlər.
Tam əminliklə olmasa belə, təxmini məlumat vermək olar ki, neftin qiyməti yüksəlməyəcək. İndiki göstəricilərə uyğun, bir müddət aşağı düşdükdə üfüqi dalğalanacaq. Bu gün neftin qiymətinin artması indiki həcm indikatorlarına uyğun artmayacaq. Amma qiymətin aşağı düşmə ehtimalı daha çoxdur”.
Qeyd edək ki, neftin qiyməti 2015-ci ildən etibarən ən yüksək həddə çatdıqdan sonra cüzi neqativ dinamika nümayiş etdirir. Ötən gün Brent markalı neftin qiyməti 2015-ci ilin yayından etibarən ilk dəfə 64 dollar, WTI markalı neft isə 57 dollar həddini aşıb. Lakin bu gün Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI neftinin qiyməti 1 barelə görə 0,01 dollar və ya 0,02% azalaraq 57,34 dollar təşkil edib.
Aysel Aslan
