"Pedaqoji təhsili olmayan şəxslər dərs deyərsə, orta məktəblərdə təhsilin səviyyəsi aşağı enəcək”
Bu barədə "Sherg.az”a "Təhsil haqqında” qanuna əlavə edilən yeni maddə barəsində hanışarkən təhsil eksperti Nabatəli Qulamoğlu bildirib.
Onun sözlərinə görə, bu məlumatda hər hansısa bir yanlışlıq var:
"Çünki pedaqoji təhsili olmayan şəxslərin məktəblərdə dərs deməsi qadağandır. Məktəbli qanunu buna icazə vermir. Əgər həmin qərar məktəbin menecer işlərini həyata keçirən insanlar üçün nəzərdə tutulubsa, bu, ola bilər. Bəzi insanların pedoqoji təhsili, təcrübələri olmasa da, idarəetmə sahəsində müəyyən bacarıqları olur.
Bu zaman həmin şxəslərin məktəblərdə işləməsi normal hal sayıla bilər. Lakin pedaqoji ixtisası olmayan şəxslərin məktəblərdə dərs deməsi düzgün deyil. Belə bir sistem ola bilməz. Belə bir qanun qəbul olunarsa, məktəblərdə təhsilin səviyyəsi çox aşağı olacaq. Təhsil sistemində müəyyən problemlər yaradacaq. Pedaqoji ixtisası olmayan şəxsin məktəblərdə dərs deməsi, sadə bir insanın həkim vəzifəsini icra etməsi deməkdir. Bu, düzgün deyil. Burada insan həyatından söhbət gedir”.
Qeyd edək ki, "Təhsil haqqında" qanuna əlavə edilən maddəyə əsasən, müəyyən şəxslərin pedaqoji təhsili olmasa da, məktəblərdə dərs deyə biləcəklər". Bu barədə Təhsil Nazirliyində keçirilən tədbirdə nazirliyin aparat rəhbərinin müavini Fərzəli Qədirov deyib. Onun sözlərinə görə, İKT sahəsində ali təhsilli mütəxəssislər var, amma pedaqoji təhsilləri yoxdur: "Bunların məktəblərdə işləməsi yaxşı olardı. Həmçinin məktəblərdə təmayülləşmə var və belə müəllimlərin məktəblərdə müəyyən qaydalar çərçivəsində dərs deməsi yaxşı olar".
Kənan Eynuroğlu
