"Azərbaycanda hər 3 uşaqdan birinə "nevroloji uşaq” diaqnozu qoyulur. Əksərən isə burada həkimlər səhvə yol verir”.
Bunu "Sherg.az”a pediatr Günay Rəsulova deyib. Həkim bildirib ki, çox zaman uşaq normal olur, lakin nevroloji uşaq hesab olunur:
"Bəzən isə valideynlər öz uşaqlarının nevroloji olduğunu düşünür. Uşaq bir qədər əsəbidir, yaşına görə fərqli əlamətləri və kaprizləri olur. Valideyn isə bunu uşağın nevroloji problemli olması kimi qiymətləndirir.
Anadangəlmə sinir sistemi xəstəliyi ilə doğulan, nevroloji uşaqlara çox rast gəlinmir. Bu zaman birbaşa nevropatoloqa müraciət etmək lazımdır. Çünki onlarda artıq nevroloji əlamətlər açıq-aydın olur. Lakin nevroloji uşaq anlayışı bir az əsəbi olan, yaxşı yatmayan uşaqlara yersiz yerə aid edilir. Əslində bunun kökündə ciddi xəstəlik dayanmır”.
Qeyd edək ki, ölkədə uşaqların sayı 2 milyon 8 yüz mindir. Dövlət Statistika Komitəsinin açıqladığı rəqəmlərə görə, onların 25 faizi nevroloji problemlidir. Belə ki, 0-13 yaşlı uşaqlar arasında əsəb xəstələrinin say göstəricisi 680039 nəfər olub.
Aysel Aslan
