Rusiyada daha bir qadın gələn ilin martında keçiriləcək prezident seçkisində namizəd olacağını açıqlayıb. Məşhur jurnalist, insan haqları fəalı Yekaterina Qordon dövlət başçılığına namizədliyini irəli sürərək, Putinə "meydan” oxuyub:
"Mən Rusiya prezidentliyinə namizəd oldum. Yəqin ki, qərarları başqaları ilə məsləhətləşmədən verən ilk prezident mən olacağam”. Bundan əvvəl tanınmış teleaparıcı Kseniya Sobçak da prezidentliyə namizədliyini irəli sürüb. Sürpriz qərarını açıqlayan Sobçak Rusiya tərəfindən Krımın ilhaqını tənqid etmişdi. Onun bu mövqeyi Rusiyada və dünyada diqqətləri üzərinə çəkməsinə səbəb olmuşdu. Rusiya Prezidentinin mətbuat katibi Dmitri Peskov növbəti seçkilərdə qadınların prezidentliyə namizəd ola bilməsini konstitusiya qanunlarına uyğun bildiyini söyləyib: "Qadınların prezidentliyə namizəd olmasında problem yoxdur və burada məsələ çox aydındır. Belə ki, Rusiya konstitusiyasındakı qanunda prezident seçilməyə layiq olan hər bir şəxsin xüsusiyyətləri qeyd olunub. Burada qadın və kişiyə aid heç bir bölüm, ayrı-seçkilik yoxdur”. Xatırladaq ki, SSRİ dağıldıqdan sonra Rusiyada keçirilən prezident seçkilərində ilk dəfədir qadınlar namizədliklərini irəli sürüblər. Bu hadisənin Rusiyada qadınların siyasi fəallaşmasının əlaməti, yoxsa hakimiyyətin işlədiyi seçki texnologiyası olub-olmadığı barədə müxtəlif mülahizələr var.
Məsələni "Şərq”ə dəyərləndirən politoloq İlqar Vəlizadə deyib ki, adıçəkilən qadın namizədlərin şansı çox azdır.
Ekspertin sözlərinə görə, Qordon və Sobçakın arxasında nə sosial baza, nə də cəmiyyətin böyük hissəsinin simpatiyası var:
"Aparılan sorğular göstərir ki, Putinə olan rəğbət digər siyasətçilərdən daha çoxdur. Həm də namizədlik məsələsində siyasi və iqtisadi resursları da nəzərə almaq lazımdır. Hakimiyyətin əlində olan resurslar qarşıdan gələn seçkidə Putinin qələbə qazanması üçün böyük avantaj deməkdir. Əslində prezidentliyə namizəd olanlar şanslarının az olduğunu gözəl başa düşürlər. Sadəcə olaraq öz piarlarını qurmaq və müəyyən dairələrin diqqətini çəkmək üçün bu addımı atırlar”.
İsmayıl
