Moskva müttəfiqi Ermənistana silahları pulsuz verir, Azərbaycana isə baha qiymətlərlə satır
"Cənubi Qafqaz dünyanın ən hərbiləşdirilmiş bölgələrindən biridir və bu çox təhlükəlidir”. Bunu Avropa Siyasi Mərkəzinin analitiki Amanda Pol deyib. Pol vurğulayıb ki, Ermənistanın və ümumiyyətlə regionun hərbiləşdirilməsi heç də müsbət hal deyil. Pol bildirib ki, Rusiya Ermənistanın ən böyük himayədarıdır: "Rusiya Ermənistanda hərbi bazasının olmağından əlavə, Ermənistana və Azərbaycana böyük miqdarda silah satır və bunu özünün balanslaşdırılmış siyasətinin bir hissəsi kimi əsaslandırır”.
Xatırladaq ki, 2015-ci il noyabrın 26-da imzalanmış razılaşmaya əsasən, Rusiya Ermənistana müasir silahlar almaq üçün 200 milyon dollar kredit vermək öhdəliyi götürüb. Ermənistan hökuməti oktyabrın 12-də 100 milyon dollarlıq birinci kredit paketini təsdiq edib. Müqaviləyə əsasən, 100 milyonluq kredit Ermənistana 20 il müddətinə verilib.
A.Polun iddialarını "Şərq”ə dəyərləndirən politoloq Qabil Hüseynli deyib ki, Avropada Adi Silahlara dair Cinah Sazişi mövcuddur. Bu sazişə görə dünyanın hər bir ölkəsi üçün silah və əsgər kvotası müəyyən edilib:
"Sazişdə Cənubi Qafqaz ölkələri üçün nəzərdə tutulan hərbi texnikanın və əsgəri heyətin sayı qeyd olunub. Amanda Polun sözlərində həqiqət var. Rusiya regionu hərbiləşdirir. Moskva müttəfiqi Ermənistana silahları pulsuz verir, Azərbaycana isə baha qiymətlərlə satır. Bizim ölkə düşmən təcavüzünə məruz qalıb. Bu səbəbdən silah-sursat almağa, hətta daha artıq silahlanmağa haqqımız çatır. Zəruri məqamda silah və əsgər kvotasını aşa bilərik”. Politoloq bildirib ki, Azərbaycan üçün ayrılan kvota çox aşağı həddədir:
"Məsələn, Ermənistan üçün nə qədər müəyyən edilibsə, Azərbaycan üçün də o qədər təyin olunub. Halbuki düşmən ölkədə 3 milyon, Azərbaycanda isə 10 milyon əhali yaşayır. Əsgərlərimizin sayı 3.3 dəfə Ermənistandan çox olmalıdır. Üstəlik, təcavüzə məruz qaldığımıza görə, bundan da çox silah almalıyıq. Nəzərə alaq ki, düşmən ölkə danışıqlardan qaçır və hər gün cəbhədə təxribatlara əl atır. Azərbaycan öz torpaqlarını düşməndən azad etmək üçün Silahlı Qüvvələrini təkmilləşdirir, ordunun hərbi hazırlığını daim yüksək vəziyyətdə saxlayır. Buna tam mənəvi haqqımız var”.
Q.Hüseynli vurğulayıb ki, Ermənistanda Rusiyanın bir neçə hərbi bazası var və onlar hər il gücləndirilir: "Gümrüdəki, Eribunidəki silah bazaları çox təhlükəlidir. Bölgədə silahlanmağa rəvac verən ölkə Rusiya və onun əlaltısı Ermənistandır. Ermənistan Avropada Adi Silahlara dair Cinah Sazişini daha çox pozur və bölgədə hərbi qarşıdurmanı körükləyir. Ölkələrin sürətlə silahlanmasından danışarkən mütləq bunun səbəblərini izah etmək lazımdır”.
İsmayıl
