"Kseniya Sobçak gah özünü jurnalist kimi qələmə verir, gah ictimai xadim adlandırılır, bəzən isə qeyri-hökumət təşkilatları ilə sıx əlaqələri gündəmə gətirilir”.
Bunu "Sherg.az”a Rusiyada prezidentliyə namizəd Kseniya Sobçakın seçilmək imkanlarından danışarkən politoloq Tofiq Abbasov deyib.
O bildirib ki, xanım namizədin prezidentliyə iddiası Rusiyanın özündə də birmənalı qarşılanmır:
"Çünki K.Sobçakın atası Sankt-Peterburqun meri, prezident Vladimir Putinin müəllimi olub. İndi isə onun müxalif mövqedən çıxış etməsi mübahisə doğurdu.
Qərbdə belə yanaşma var ki, guya Kseniya Sobçak hakimiyyətin ortaya atdığı şəxsdir. Onun opponent kimi ortaya çıxmasına səbəb isə həqiqi müxalifəti öz tərəfinə cəlb edib, Rusiya hakimiyyətinə kömək etməkdir. Belə insanlar çox dəyişkən mövqeyə malik olurlar. Belələrində tez-tez fikirlərini, mövqeyini dəyişmək, bir cinahdan digərinə keçmək addımları güclüdür. Ola bilər ki, xanım namizəd ümumiyyətlə, başqa cinahdan prosesə qatılıb. Ortada bir fakt var ki, onun hazırda böyük piar kampaniyası aparılır və onun qərargahının işlərini aparan isə Boris Yeltsinin komandasına daxil olan şəxslərdəndir.
Belə fikir var ki, Kseniya Sobçakı bu işə ilhamlandıran məhz Boris Yeltsinin ailəsi – xanımı və qızlarıdır. Bunun məqsədi kimi isə Rusiyada hakimiyyətin silkələnməsi, onların rahat vəziyyətini daraltmaq göstərilir. Hələ ki, ortada nəticə yoxdur, hakim partiyanın namizədi özünü büruzə vermir. Ümumiyyətlə, hakim partiya ehtiyatlı mövqe sərgiləyir”.
Qeyd edək ki, Kseniya Sobçak beynəlxalq hüquq baxımından Krımı Ukrayna ərazisi hesab etdiyini deyib. Rusiya Liberal Demokrat Partiyasının sədri Vladimir Jirinovski isə bəyan edib ki, Kseniya Sobçak bu fikirlərinə görə cəzalandırılmalıdır.
Aysel Aslan
