"Ehtiyat fondumuz gələn il tükənəcək. Əgər Moskva çıxış yolu tapmazsa, ölkə ağır vəziyyətədüşəcək. İndi neftin qiyməti 50 dollardır. Ona görə də yeni qaydaları təcili həyata keçirmək lazımdır”. T.Qolikova vurğulayıb ki, büdcə hesablamalarına əsasən, 2017-ci ildə Rusiyanın Ehtiyat Fondu tam şəkildə tükənəcək və hökumət Milli Rifah Fondunun vəsaitlərindən istifadə etməyə məcbur olacaq. Məlumat üçün bildirək ki, Ukrayna və Suriya böhranından dolayı Qərb dövlətləri xeyli müddətdir Rusiyaya iqtisadi sanksiyalar tətbiq edir. Zaman-zaman verilən açıqlamalardan aydın olur ki, Moskva sanksiyalara tab gətirməkdə ciddi çətinlik çəkir və iqtisadi böhrana sürüklənir.
Hesablama Palatasının etirafını "Şərq”ə şərh edən politoloq Qabil Hüseynli deyib ki, uzun müddət nə Qərb, nə də Rusiya geri addım atacaq:
"Nə qədər ki, Rusiyada Vladimir Putin hakimiyyət başındadır, Moskva indiki siyasi xətti yürütməkdə davam edəcək. Qərb də öz növbəsində Rusiyaya tətbiq etdiyi sanksiyalardan nəinki imtina edəcək, üstəlik, daha da sərtləşdirəcək. Çünki Avropa iqtisadi təzyiqlərin nəticə verdiyinin fərqindədir”. Ekspertə görə, prosesin bu şəkildə davam etməsi Rusiyanı iqtisadi çöküşə sürükləyir: "Neftin qiymətinin nisbətən bahalaşması prosesin qarşısını almaq gücündə deyil. Çünki ciddi qiymət artımından söhbət getmir. Rusiyanın xarici valyuta gəlirləri xeyli azalıb. Üstəlik, Kreml durmadan hərbi xərclərini artırır. Qərb mənbələrinin verdiyi məlumata görə, Rusiya illik gəlirinin 60 faizini hərbi məsələlərə yönəldir. Militarizm sovet imperiyasını çökdürdü, Rusiyanın da bu siyasəti onu çökdürə bilər. Bir sözlə, Rusiya-Qərb qarşıdurmasının sonunda ya ölkədə hamı Putinə, mövcud rejimə qarşı ayağa qalxacaq, ya da ölkədə vilayətlərin mərkəzdən qaçma meyilləri güclənəcək. Bu isə ölkənin parçalanması deməkdir”.
İsmayıl
