Gürcüstanın sabiq prezidenti, Odessa vilayətinin keçmiş qubernatoru Mixail Saakaşvili Ukrayna Ali Radasının qarşısında etirazçıların quraşdırdığı çadırlardan birində məskunlaşıb.
Mariinski parkında qurulan çadırın qarşısında bir neçə mühafizəçi keşik çəkib. Eks qubernator müxalif siyasətçiləri də ona qoşulmağa çağırıb və Poroşenkonun istefa verməsini tələb edib.
Bu arada Ukraynanın Miqrasiya Xidməti Saakaşviliyə qaçqın statusu verməkdən imtina edib.
Baş prokuror Yuri Lutsenko deyib ki, Kiyev hökumətinin sabiq qubernatoru deportasiya etmək haqqı var.
Ukraynadakı siyasi prosesləri "Şərq”ə şərh edən politoloq İlqar Vəlizadə deyib ki, Poroşenkonun vəzifədən gedəcəyi ilə bağlı səsləndirilən fikirlər tələsik deyilmiş sözlərdir. Ekspertin sözlərinə görə, Ukrayna Prezidenti yalnız Qərb ilə münasibətləri korlayacağı halda hakimiyyətdən uzaqlaşdırıla bilər:
"Hazırda Poroşenko ABŞ və Avropa ölkələri ilə normal münasibət saxlayır. Saakaşvili isə çalışır ki, müəyyən proseslərlə Poroşenkonun Qərblə münasibətlərini korlasın və onu gözdən salsın. Hətta tərəflər arasında silahlı qarşıdurmanın yaranmasını da arzu edir. Əgər etirazlar silahlı müqavimət şəklində olarsa, hökumət qüvvələri müxaliflərə silahla qarşılıq verər. O zaman Poroşenko həm Qərbdə, həm də Ukraynada öz tərəfdarlarını itirəcək və dəstəyini itirəcək”.
Analitik bildirib ki, indiki məqamda Poroşenko ölkədəki vəziyyətə tam nəzarət etsə də, hələlik silahlı qarşıdurmaya əl atmır:
"İndi Ukraynada əsəb müharibəsi gedir, kimin əsəbi möhkəm olacaqsa, o da qalib gələcək. Saakaşvilini dəstəkləyən müxalif qüvvələr açıq hərəkətlərə keçməyə tələsmir. Timoşenko da gözləmə mövqeyindədir. Sanki daha ciddi proseslərin baş verməsini gözləyirlər. Yaxın aylarda Ukraynanın aqibəti bəlli olacaq”.
İsmayıl
