Bu vaqonlar “İçərişəhər” stansiyasında qalacaq və istənilən sərnişin gəlib yaxından tanış ola bilər
"Bakı Metropoliteni” QSC-nin mətbuat xidməti və ictimaiyyətlə əlaqələr şöbəsinin rəisi Nəsimi Paşayevin sözlərinə görə, ötən əsrdə istehsal olunan vaqonların bərpa olunmasında əsas məqsəd sərnişinlərə nostalji hissi yaşatmaqdır. Yəni sözügedən vaqonlar muzey xarakterlidir.
Bərpa olunan 3 vaqonun hər birinin ayrı-ayrı illərdə istehsal olunduğunu vurğulayan N.Paşayevin sözlərinə görə, bu vaqonlar 30-cu, 40-ci illərdə və 70-ci illərdə istehsal olunub.
Sözügedən vaqonların daimi hərəkət üçün nəzərdə tutulmadığını bəyan edən qurum sözçüsü hazırda retro qatarların "İçərişəhər” stansiyasında sərnişinlərin xidmətində olduğunu deyib: "Xeyli sayda sərnişin retro qatarlara baxmaq üçün gəlib nostalji hisslər yaşayırlar. Bu vaqonlar sabah da metronun "İçərişəhər” stansiyasında qalacaq və istənilən sərnişin gəlib yaxından tanış ola bilər. Çalışacağıq ki, müəyyən müddətdə həmin qatarları xəttə buraxaq və sərnişinlərin qatarlarla tanış olmaq fürsəti olsun. Yəni bir neçə dəfə də olsa sərnişin daşıma ehtimalı da var. Amma köhnə qatarlar olduğu üçün daimi sərnişin daşıma üçün nəzərdə tutulmayıb. Çünki bu qatarlar tam güclə işləmədikləri üçün hərəkət zamanı problem yarada bilər”.
N.Paşayevin sözlərinə görə, vaqonlar orijinallığı qorunmaqla yenidən bərpa edilib: "İstər rəngləri, istər oturacaqları, istər işıqlandırılması, bütün avadanlıqları əvvəlki vəziyyətinə gətirilib. Əsas məqsəd odur ki, sərnişinlər rahat baxsınlar, nostalji hisslər yaşasınlar. Ola bilsin ki, 70-ci illərdə istifadə olunan qatarlara o vaxtı minən sərnişinlər nostalji hisslər yaşayacaq”.
Şəymən
