ABŞ Prezidenti Donald Tramp miqrasiya vizası üçün alınan "Green Card” lotoreyasını ləğv etmək istəyir. "Green Card” lotoreyasını tənqid edən Tramp bildirib ki, rəsmi Vaşinqton real xidmətlər əsasında immiqrasiyanın tərəfdarıdır. Lakin ölkənin təhlükəsizliyi üçün bu qərar mütləq qəbul edilməlidir: "Mən bunu çoxdan etmək istəyirdim. Bu lotoreyadan ən qısa müddətdə qurtulmaq lazımdır”.
Məlumat üçün deyək ki, Nyu-Yorkda terror aktı törədən Özbəkistan vətəndaşı Seyfullo Saipov 2010-cu ildə "Green Card” lotoreyasını qazanaraq ABŞ-a köçüb. Bunu nəzərə alan ABŞ hakimiyyəti lotoreyanı ləğv etmək, hətta Özbəkistan vətəndaşlarının ölkəyə girişinə qadağa qoymaq istəyir.
Məsələ ilə bağlı "Şərq”ə fikirlərini bölüşən politoloq Azər Rəşidoğlu deyib ki, ABŞ Prezidenti Donald Tramp "Green Card”ı çoxdan ləğv etmək istəyirdi. Nyu-Yorkda baş verən terror aktı bunun üçün yaxşı bəhanə oldu:
"Ağ Ev siyasətinin mərkəzində ölkəyə miqrant axınının qarşısını almaq dayanır. Tramp özü dəfələrlə bəyan edib ki, Yaxın Şərq və digər müsəlman ölkələrindən Amerikaya gəlmək istəyən insanlara məhdudiyyət qoymağı planlayır. Əlbəttə, hər bir dövlət öz ərazisində baş verən terror və ona bənzər cinayət hadisələrinin qarşısını almaq üçün müəyyən addımlar atmalıdır. Lakin islam ölkələrindən gələn bütün müsəlmanları "terrorçu” kimi görmək qəbuledilməzdir.
Demokratiyanın əsas prinsiplərindən biri fərdi məsuliyyət məsələsidir. Bir və yaxud bir neçə hadisəni əsas götürərək bütövlükdə Şərq bölgəsindən gələn insanlara "terrorçu” damğası vurmaq doğru deyil. ABŞ-da terror aksiyası baş verəndən sonra yaşanan bütün olaylar göstərir ki, məhz bu hadisədə maraqlı olan tərəflər olub.
Trampın daha əvvəl "Green Card”ı ləğv etməsi, miqrant axınının qarşısını almağa çalışması ictimaiyyətdə kifayət qədər dəstək qazanmırdı. Lakin terror aktından sonra bu tipli fikirlər səsləndirməsi böyük qisim tərəfindən alqışlandı”.
Ekspertə görə, terror hadisəsinin arxasında kimlərin olduğunu dəqiq araşdırmaq lazımdır:
"Dünyada mövcud olan İŞİD mifi bütün güc mərkəzlərinə öz cinayətlərini həyata keçirməyə şərait yaradır. O baxımdan hesab edirəm ki, bu, terror hadisəsindən daha çox siyasi məsələyə bənzəyir. Məhz əsas hədəf "Green Card”ın ləğvi və müsəlmanların ABŞ-a girişinə qadağa qoymaqdır”.
İsmayıl
