Türkiyənin Hakkari vilayətinin Şəmdinli rayonunda təhlükəsizlik gücləri ilə PKK-lı terrorçular arasında baş verən atışmadan sonra PKK terror təşkilatına qarşı əməliyyatlar həyata keçirilib. Türkiyə Daxili işlər nazirliyinin yaydığı məlumata görə, əməliyyatlar nəticəsində 31 terrorçu məhv edilib.
Terrorçularla atışma zamanı 8 türk əsgəri də şəhid olub. Ekspertlərə görə, bir müddət fasilədən sonra PKK-çıları yenidən səhnəyə çıxaran xarici güclər Türkiyəyə təzyiq göstərməyə çalışırlar. Terrorçuların yenidən aktivləşməsini "Şərq”ə şərh edən politoloq Məhəmməd Əsədullazadə deyib ki, Türkiyənin müstəqil siyasəti, Şimali İraq Kürd muxtariyyətinə qarşı təzyiqləri, həmçinin, Suriyada fəal siyasi-hərbi iştirakı müəyyən dairələri narahat etməyə başlayıb. Ekspertin sözlərinə görə, ABŞ-ın Suriyadakı YPG-ni silahlandırması PKK-nın da güclənməsinə gətirib çıxarıb:
"Amerika silahları ilə təchiz olunmuş PKK-nın sükutdan sonra yenidən təxribatlara başlaması təsadüfi deyil. Türkiyə şimali Suriyada YPG-yə qarşı amansız əməliyyatlar aparır. Vaşinqton isə Türkiyənin bu siyasətinə qarşıdır. Çünki türk ordusunun terror təşkilatına qarşı əməliyyatları ABŞ-ın maraqlarına cavab vermir. Ona görə də Türkiyəni yenidən daxili təxribatlara çəkməklə YPG-yə qarşı əməliyyatdan çəkindirməyə çalışırlar. Hesab edirəm ki, PKK-ya qarşı Türkiyənin anti-terror əməliyyatları uğurla davam edəcək. Suriyada və İraqda çox ciddi geosiyasi proseslərin şahidi olacağıq”.
Analitik bəyan edib ki, Türkiyənin bu xaosdan çıxması üçün apardığı siyasi-hərbi kampaniya ölkənin ümumi təhlükəsizliyinə xidmət edir:
"ABŞ silahlarına güvənən terrorçular Türkiyə təhlükəsizlik qüvvələrinə qarşı daha ağır zərbə vurmağa cəhd göstərirlər. PKK-nın arxasındakı güclər isə Türkiyəni siyasi xaosa sürükləməyə çalışırlar. Şimali İraqda kürd muxtariyyətinin müstəqillik fiaskosu və Suriyada planların gerçəkləşməməsi yenidən PKK faktorunu gündəmə gətirib. Lakin Türkiyə terrora qarşı davamlı qələbəsini təmin edəcək”.
İsmayıl
