Milli Məclisinin bu gün keçirilən iclasında "Tütün məmulatlarının istifadəsinin məhdudlaşdırılması haqqında", "Tütün və tütün məmulatı haqqında", "Televiziya və radio yayımı haqqında", "İctimai televiziya və radio yayımı haqqında" qanun layihələrinin 3-cü oxunuşda müzakirəsi zamanı mübahisələr yaranıb.
Sherg.az-ın xəbərinə görə, birinci vitse-spiker Ziyafət Əsgərov teatr tamaşalarında və filmlərdə siqaretin məhdudlaşdırılmasının aradan qaldırılması təkliflərinə münasibət bildirib:
"Hollivud filmlərinin 95 faizindən siqaretlərin reklamı yığışdırılıb. Rusiyanın Dövlət Dumasında isə qərar qəbul ediblər ki, həm oynanılan teatr tamaşalarında, həm də çəkilən kinofimlərdə siqaret çəkmək yığışdırılsın. Mövcud filmlərdə də üzərinə "kölgə” salınsın".
Z.Əsgərov Mədəniyyət komitəsinin sədri Rəfail Hüseynovun səsləndirdiyi iradlarına da cavab verib:
"Deyirsiniz ki, teatr tamaşasında və flimlərdə siqaret çəkməmək Azərbaycan Konstitusiyasında yaradıcılıq azadlığına ziddir. Buna çox təəccübləndim. Adi bir vətəndaş desəydi, başadüşülən olardı. Amma bunu parlamentin komitə sədri deyir. Başa düşmürəm, siqaretin teatr və kino yaradıcılığına nə aidiyyatı var?! Onda siz tələbələrinizə deyin, "Azərbaycan ədəbi mühitində siqaretin Konstitusiya hüququnda rolu” mövzusunda namizədlik dissertasiyası müdafiə etsinlər. Baxaq görək, bəlkə doğrudan da nəsə var?”.
Qeydf edək ki, R.Hüseynov bunun yaradıcılıq azadlığına zidd olduğunu deyib.
Anar
