Braziliya ABŞ-nin təzyiqlərinə baxmayaraq BRİKS ölkələri ilə əlaqələrini möhkəmləndirmək niyyətindədir.
Teleqraf xəbər verir ki, bu barədə Braziliya prezidentinin beynəlxalq məsələlər üzrə xüsusi köməkçisi Selsu Amorim Financial Times qəzetinə müsahibəsində bildirib.
Onun sözlərinə görə, ABŞ prezidenti Donald Trampın Braziliyaya qarşı rüsum tətbiq etməklə hədələməsi ölkəni BRİKS-lə əməkdaşlığı daha da gücləndirməyə sövq edir. Amorim vurğulayıb ki, Braziliya beynəlxalq münasibətlərini genişləndirmək və hər hansı bir ölkədən asılı olmamaq istəyir.
Prezidentin köməkçisi əlavə edib ki, Braziliya yalnız Rusiya, Çin və Hindistan kimi BRİKS üzvləri ilə deyil, Avropa, Asiya və Cənubi Amerikanın digər ölkələri ilə də əlaqələri dərinləşdirməkdə maraqlıdır.
Xatırladaq ki, Donald Tramp 1 avqustdan etibarən Braziliyadan idxal edilən bütün mallara 50 faizlik gömrük rüsumu tətbiq olunması barədə göstəriş verib. Cavab olaraq Braziliya prezidenti Lula da Silva iqtisadi qarşılıqlılıq prinsipini təsbit edən qanunun tətbiqinə dair fərman imzalayıb.
