Yaxın Şərq turunu tamamlayaraq ABŞ-yə qayıdan Donald Tramp, “Time” jurnalının onu əks etdirən yeni buraxılışından narazılığını gizlətməyib.
Sherg.az xəbər verir ki, jurnalın üz qabığında “Yaxın Şərqdə Qələbə” başlığı ilə yer alan Trampın fotosunda, onun saçının görünməməsi və başının üstündə “kiçik tacı xatırladan qəribə bir obyektin” yerləşməsi diqqət çəkib.
Tramp öz sosial media platforması “Truth Social”-da paylaşım edərək bunları yazıb:
“Həqiqətən qəribə! Altdan çəkilən fotoları heç vaxt sevməmişəm, amma bu şəkil inanılmaz dərəcədə pisdir. Nə edirlər, niyə edirlər, anlamıram.”
Tramp əlavə edib:
“Bəlkə də bütün dövrlərin ən pis qapağı budur.”
Buna baxmayaraq, o, “Time” jurnalındakı məqalənin “nisbətən müsbət” yazıldığını etiraf edib.
Jurnalın mübahisəli sayında Tramp administrasiyasının Qəzzada atəşkəsi necə təmin etdiyi izah olunur. Yazıda bu razılaşmanın “Trampın ikinci prezidentlik dövrünün əsas uğuru” ola biləcəyi qeyd edilib.
“Time” jurnalının qapağı Trampın İsrailə səfər etdiyi gün yayımlanıb.
Tramp burada azad edilən israilli girovların ailələri ilə görüşüb, Knessetdə (İsrail Parlamenti) çıxış etdikdən sonra Şarm əl-Şeyxə keçib.
Misirdə keçirilən sammitdə məqsəd Qəzzədə daimi atəşkəsin dəstəklənməsi, müharibənin dayandırılması və Fələstin torpaqlarının yenidən qurulması üçün uzunmüddətli idarəetmə planının hazırlanması olub.
