Yeni bir araşdırma, həddindən artıq duz qəbulunun beyində iltihablanmaya yol aça biləcəyini və bunun yüksək qan təzyiqinə səbəb ola biləcəyini üzə çıxarıb.
Sherg.az Kanadadakı McGill Universitetinin apardığı araşdırmaya görə, bəzi yüksək qan təzyiqi növləri düşündüyümüz kimi böyrək
lərdən deyil, beyindən qaynaqlanır. Bu nəticə, niyə bəzi təzyiq növlərinin böyrək yönümlü müalicələrə cavab vermədiyini izah edə bilər.
Masha Prager-Khoutorsky:
“Hipertoniya ilə bağlı olaraq beynin rolu indiyədək əsasən nəzərdən qaçırılmışdı. Səbəb, beynin araşdırılmasının çətin olması idi. Ancaq yeni texnologiyalar sayəsində bu dəyişiklikləri birbaşa müşahidə edə bilirik.”
İnsan pəhrizi simulyasiya edildi
"Neuron" jurnalında yayımlanan tədqiqatda, insanların qidalanma vərdişləri siçovullar üzərində təqlid edilib. Siçovullara 2% duz tərkibli pəhriz tətbiq olunub. Siçovulların seçilmə səbəbi, onların su və duz balansını idarəetmə üsullarının insanlara daha yaxın olması ilə bağlıdır. Bu da nəticələrin insanlar üçün daha etibarlı olmasına şərait yaradıb.
Tədqiqatçılar, artıq duzun beyində müəyyən bir sahədə immun hüceyrələrini aktivləşdirdiyini müəyyən ediblər. Bu isə iltihablanmaya və vazopressin hormonunun artmasına səbəb olub. Vazopressin böyrək funksiyaları, duz balansı və qan təzyiqinin tənzimlənməsində əsas rol oynayır. Hormonun yüksəlməsi siçovulların qan təzyiqində artıma gətirib çıxarıb. Bu tapıntılar, yüksək təzyiqin səbəbinin beyində ola biləcəyini göstərir.
Tədqiqatçılar indi digər yüksək təzyiq növlərinin də oxşar mexanizmlərlə inkişaf edib-etmədiyini araşdırmağı planlaşdırır.
Duz uzun müddətdir ki, yüksək qan təzyiqinin əsas səbəblərindən biri kimi tanınır. Həddindən artıq alkoqol, siqaret istifadəsi və genetik meyl də təzyiqi artıran digər həyat tərzi faktorları arasında göstərilir.
