İnsana ağrı hiss etdirmədən bədənə daxil olmağı bacaran parazit, tətbiq etdiyi üsulla yeni nəsil ağrıkəsicilərə ilham verir.
Sherg.az xəbər verir ki, su yolu ilə yoluxan parazit qurd olan "Schistosoma mansoni" insan bədəninə gizli şəkildə daxil olmaqda ustalaşıb.
Onun sürfələri dəri vasitəsilə bədənə keçir, lakin bu zaman nə ağrı, nə də qaşınma hiss olunur. Nəticədə isə milyonlarla insana təsir edən xroniki bir xəstəlik yaranır: şistosomiaz.
Alimlər artıq bu hiylənin sirrini tapıb. Araşdırmaya görə, parazit insanın dərisindəki müəyyən sinir hüceyrələrini zəiflədən molekullar ifraz edir.
Bu sinirlər TRPV1+ neyronları kimi tanınır və normalda istilik, yanma və ya qaşınma kimi siqnallarla beyni təhlükəyə qarşı hərəkətə keçirir. Eyni zamanda immun cavabı da işə salaraq orqanizmi qorumağa çalışır.
ABŞ-dəki Tulane Tibb fakültəsindən immunoloq De’Broski Herbert bu kəşfin yeni nəsil ağrıkəsicilərin hazırlanmasına yol aça biləcəyini deyir.
Herbert bildirib: “Əgər sinir hüceyrələrinin aktivliyini dayandıran molekulları müəyyən edə bilsək, hazırda istifadə olunan opioid əsaslı müalicələrə alternativ bir üsul inkişaf etdirə bilərik.”
Tədqiqatçılar siçanları yoluxduraraq və onları nəzarət qrupları ilə müqayisə edərək sınaqlar aparıblar. Yoluxmuş heyvanların sinir hüceyrələrində immun reaksiyanın xeyli zəiflədiyi müşahidə edilib. Bu da parazitin sinirləri zəiflədərək bədənə daxil olmasını asanlaşdırdığını sübut edib.
Alimlər düşünür ki, sözügedən molekullar iki istiqamətdə faydalana bilər:
Çirkli su ilə təmasda olan insanlar üçün şistosomiazə qarşı qoruyucu müalicə hazırlamaq.
Xroniki sinir ağrılarını yüngülləşdirəcək yeni dərmanların yaradılmasına imkan vermək.
Lakin immun sistemi zəiflədən təsirlərinə görə daha çox araşdırma aparılmasının vacibliyi vurğulanır.
