"Sahibkarlara bu günə qədər bir milyard manat məbləğində güzəştli kreditlər verilib. Ancaq hər bir rayonun rəhbər orqanları özləri çalışmalıdır, şərait yaratmalıdır, sahibkarları cəlb etməlidir və onların fəaliyyətinə buna görə qiymət veriləcək”. Bunu Azərbaycan Prezidenti İlham Əliyev Ağstafada "Karvan-L EKO” sənaye parkında inşası başa çatdırılan müəssisələrin və istixana kompleksinin açılışında müəssisənin işçiləri və rayon ictimaiyyətinin nümayəndələri ilə görüşündə söyləyib.
Dövlət başçısı qeyd edib ki, indi fermer olmaq yenə də şərəfli işə çevrilir: "Xüsusilə dövlət dəstəyi, yaradılan imkanlar nəzərə alınır, subsidiyalar verilir, güzəştlər edilir. Fermerlər torpaq vergisi istisna olmaqla, bütün vergilərdən azaddırlar. Gübrə, yanacaq, texnika güzəştli şərtlərlə verilir. Bu, dövlət siyasətidir. Hər bir sahibkar məsuliyyətli olmalıdır və Vətəni sevməlidir”.
Ölkə başçısının fikirlərini müsbət dəyərləndirən iqtisadçı-ekspert Vüqar Bayramov "Şərq”ə bildirib ki, icra hakimiyyəti orqanlarının sahibkarlığın inkişafı baxımından fəaliyyətləri, xidmətləri olduqca vacibdir. Amma etiraf etmək lazımdır ki, əksər layihələrdə yerli icra hakimiyyəti orqanlarının sahibkarlıq fəaliyyətinə müsbət təsirlərini müşahidə etmirik: "Sahibkarlara dəstək yalnız mühitin yaxşılaşdırılması ilə tamamlanmamalıdır. Eyni zamanda sahibkarlar üçün maliyyə resurslarına çıxış imkanları da yaradılmalıdır. Bu mənada ölkə Prezidentinin sahibkarlara dəstək olması, yerli icra hakimiyyəti orqanlarının sahibkarları dəstəyə səsləməsi indiki postneft dövründə müsbət addımdır. Və bu, Azərbaycan iqtisadi diversifikasiyası ilə bağlı prioritetlərə uyğundur. Təbii ki, yerli icra hakimiyyəti başçıları Prezidentin tapşırığına uyğun olaraq sahibkarların maliyyə vəsaitlərinə çıxış imkanlarını artırmağa çalışmalıdır. Belə olarsa, sahibkarlar daha çox investisiya yatıraraq çoxsaylı iş yerləri yaradıb, regionun inkişafını stimullaşdıra bilərlər. Ona görə də, yerli icra hakimiyyəti orqanlarının sahibkarlara dəstək olmasına ciddi ehtiyac duyulur”.
Ayyət Əhməd
