“Rusiya bir tərəfdən strateji müttəfiqi Ermənistanı yenidən silahlandırır, digər yandan Azərbaycanla münasibətləri korlamaq istəmir”
“Moskva üçün bu ikisini paralel idarə etmək getdikcə çətinləşir”
“Azərbaycan cəmiyyəti Rusiyanın siyasətindən narazıdır, əksəriyyət ordunun Laçın dəhlizini nəzarət altına almasını və Qarabağdakı separatçıların tərksilahını istəyir”
“Ermənistan hakimiyyəti və Qarabağdakı erməni separatçılarla yanaşı Rusiyanın da regional problemləri artıb. Xankəndidə su kəsilir, rusiyalı hərbçilər su daşıyırlar, silah anbarında partlayış baş verir, alovu söndürməyə çalışırlar, mobil əlaqə kəsilir, bunun bərpası haqqında düşünmək məcburiyyətində qalırlar. İndi də rusiyalı hərbçilər tökülüşüblər Gorus-Qafan yoluna. Ərazimizə düşən və azərbaycanlı sərhədçilərin bağladığı yolu açmağa çalışırlar”.
Bu sözləri “Atlas” araşdırmalar mərkəzinin rəhbəri, politoloq Elxan Şahinoğlu deyib.
O, daha ətraflı “Sherg.az”a danışdı:
“Rusiyalı hərbçilər özlərini Abxaziyada, Cənubi Osetiyada, qeyri-rəsmi var olduqları Dnestr və Donbass bölgəsində daha rahat hiss edirlər. Çünki ayırıcı xətlər bəllidir, toqquşmalar yox dərəcəsindədir, mövqelərini qoruyurlar. Qarabağ və Azərbaycan-Ermənistan sərhədində isə durum tam fərqlidir. Moskvanın vasitəçiliyi ilə müharibənin bitməsini şərtləndirən iki bəyanatın qəbul olunmasına baxmayaraq, toqquşmalar və gərginliklər davam edir. Faktiki olaraq münaqişənin yeni fazasına daxil olmuşuq. Anti-terror əməliyyatının həyata keçiriləcəyi də istisna deyil”.
E.Şahinoğlunun fikrincə, şimal qonşumuz getdikcə “dalana dirənir”:
“Rusiya bir tərəfdən strateji müttəfiqi Ermənistanı dəstəkləyir, onu yenidən silahlandırır, Qarabağda erməni separatçıları ilə təmas içindədir, ancaq o biri tərəfdən Azərbaycanla münasibətləri korlamaq istəmir. Moskva üçün bu ikisini paralel idarə etmək getdikcə çətinləşir. Azərbaycan cəmiyyəti Rusiyanın siyasətindən narazıdır, əksəriyyət ordunun Laçın dəhlizini nəzarət altına almasını və Qarabağdakı separatçıların tərksilahını istəyir. Ermənilərin artan təxribatları bizdən bu prosesi sürətləndirməyi tələb edir. Kreml iki yoldan birini seçməlidir: ya Ermənistanı təxribatlardan çəkindirməli, iki dövlət arasında sülh sazişinin imzalanmasını, sərhədlərin müəyyənləşdirilməsini, o cümlədən Zəngəzur dəhlizinin fəaliyyətə başlamasını sürətləndirməli və bununla bölgədə sabitliyə nail olmalı, ya da Ermənistana və onun təxribatlarına dayaq durmaqla tədricən Azərbaycanla münasibətləri gərginləşdirməlidir”.
